# انت وحيد ؟ لا قصدك ضعيف و انانى و مكسور ): #

من طرف **admin** السبت يونيو 27, 2009 4:40 pm

السلام عليكم و رحمة الله و بركاته

الوحده : دائرة مغلقه من صنع اصحابها
انا مش فيلسوف بس فجأة لقيت الجملة دى بتتكون فى عقلى
( حسيت انى اسامه منير فجأة كده )

طيب ازاى احنا المسئولين عن الوحدة اللى بنحس بيها ؟
خبيرة الارصاد النكديه هتشرحلكم حالا

دلوقتى حضرتك وحيد لانك مش ليك اصحاب او ليك بس مش حاسس نفسك معاهم
طيب مش ليك اصحاب تبقى مشكلتك ولا مشكلة الناس ؟
ايه يعنى مرة و عشره اصحابك خانوك , ايه يعنى مش لاقى حد تستريح بجد معاه
لو مدورتش مش هتلاقى , ولو مجربتش مش هتتعلم

طيب عندك اصحاب بس مش حاسس نفسك معاهم
غلطتك برضه , حاول توصل احساسك و ارائك موصلتش يبقى اسمك حاولت
اتعرف على اصحاب تانيين فى المجال اللى نفسك تتفوق فيه او تشتغل فيه او حتى بتهتم بيه
معرفة الناس كنوز , يا أما كنوز مزيفة او كنوز حقيقية و فى كل الاحوال انت مستفيد
مستفيد خبرة - قوة - صبر- طولة بال - ذكاء اجتماعى

دلوقتى مثلا حضرتك طالب فى الجامعه , لما بتدخل بتكون صداقات و زمالة و معارف
و فجأة تحس انك برضه غريب وسطهم و انك وحيد و ان محدش منهم فاهمك
طيب ليه مش بتفكر مع نفسك ايه بالظبط اللى انت عايزهم يحسوه معاك ؟
ايه اللى انت عايزهم يهتموا بيه؟
ايه مشاكلك و اهتماماتك اللى عايز تشاركها معاهم ؟
مين الغلطان انت ولا هما ؟

طيب انت دلوقتى مثلا بتحب الشعر و اصحابك ملهمش فيه
ما تدور على ناس بتكتب او بتقرأ و اتعرف عليهم و صاحبهم
عشان تلاقى التشجيع اللى انت عايزه و التقدير و التفاهم
مش قاعد وحيد وسط اصحابك و بتقول اصل محدش منهم فاهمنى و لا مقدرنى
و بعدين ما تتصرف , ما تتحرك مستنى مين يطبطب عليك و يقولك يا عينى يا بنى ده انت وحيد

مفيش حاجة اسمها وحدة , الوحدة دى اختراع بشرى
احنا اللى عملناه و احنا اللى عيشنا نفسنا فيه
الدنيا كلها بتندهلك و محتجالك , مش مهم تعرف ناس عشان مصلحتك او عشان انت محتجلهم
دور على ناس محتاجين ليك , دور على ناس الدنيا ادتلهم ظهرها
لانهم فقرا او مسنيين او ايتام او ارامل او حتى اطفال شوارع
الناس دى بجد محتاجه كل يوم بيعدى من حياتك و انت زهقان و ووحيد و مش لاقى حاجة تعملها ولا حد تتكلم معاه و يحس بيك
متبقاش انانى و دايما مستنى الناس تحس بيك , حس انت بيهم الاول
كفايه بقى تبقى مكسور و مهموم و وحيد
قوم اقف بقى , كفايه استسلام
خلى لحياتك معنى , عيش و اتمتع و متع اللى حواليك
مين عارف يمكن بكرة متبقاش موجود , اعمل حاجة الناس تفتكرك بيها فى الخير
متعش و تموت نكرة بلا معنى , بلا قيمة , بلا اسم